50 жылдан кейін университет қабырғасында кездескен түлектер
-
24 маусым, 2023
![50 жылдан кейін университет қабырғасында кездескен түлектер]()
24 маусым күні Қазақ ұлттық қыздар педагогикалық университетінде осыдан 50 жыл бұрын, яғни 1973 жылы оқу орынын тәмәмдаған түлектердің мерейтойлық кездесу кеші болып өтті.
Университеттің конференц залына жиналған түлектерді Филология институтының директоры Кунипа Ашинова қарсы алып, мерейтой иелерін құттықтап, оқу ордасының бүгінгі тыныс-тіршілігімен таныстырды.
1969 жылы филология институтына «орыс тілі мен әдебиеті» мамандығына оқуға түскен 1 топқа іріктелген сол кездегі 25 қыз бүгінгі күні ақ жаулықты ана, әже атанған. Барлығы да мамандықтары бойынша білім саласында қызмет еткен. Студент кездеріне бір сәтке қайта оралған түлектер университет қабырғасында өткен жастық шақтарын сағынышпен еске алып, қызықты оқиғаларын айтып, мәз-мейрам күйге енді.
Ректор Күләш Құнантаеваның тұсында білім алған түлектер академик Зәки Ахметов, Кочева Клавдия Ивановна, Тайшенова Майкеш Дархановна, Исаев Сейілбек Мұхамедиярұлы сынды білікті ұстаздардан дәріс алғандығын, олардың тек білім беріп қана қоймай, өмірден өз орындарын сәтті тауып, кез-келген қиын сәтте де қиналмай шешім қабылдай білу, әрдайым алда болу қасиеттерін бойларына дарытқандығын, үлкен өмір жолдарына сәуле шашқан тұлғалар болғандығын ерекше тебіреніспен атап өтті.
Әділханова Айнагүл. 50 жылдық түлек : «Біз еңбек жолымызды мектепте мұғалім болып бастадық. Кейін келе өз біліктілігімізді арттырып, мектеп директоры, директордың орынбасары, біліктілікті арттыру институттарында, кейбіріміз жоғары оқу орындарында лауазымды қызметтер атқардық. Қай жерде жүрсек те білім саласынан алысқа кеткен жоқпыз. Жасымыз 70-ті алқымдап қалса да арамызда әлі күнге қызметте жүргендеріміз бар. Мысалы Бақыт Карибаева деген курстасымыз Қарағандыда мұғалім болып жұмыс жасайды. Мен Әділханова Айнагүл қосымша білім беру орталығын, балабақшамыз бар соны басқарып отырмын. Сонымен қатар тобымыздың мақтанышы деп академик, профессор Баяндина Сәулені айтар едім. Қазіргі таңда Аблайхан атындағы қазақ халықаралық қатынастар университетінде сабақ береді. Тағы бір қызымыз әрдайым үздік оқып, белсенді болған, «Айгүл» ансамбльінің мүшесі болған Иманжүсіп Раушан қазір Еуразия ұлттық университетінің профессоры. Кездесуге бәріміз келе алмадық әрине, Институт бітіргенімізге жарты ғасыр уақыт болды, бәріміз зейнеткерлік демалыстамыз. Арамыздан бақилық өмірге кеткендері де бар. Жатқан жерлері жайлы болсын дейміз».
Қонақтар университет мұражайына, оқу аудиторияларына, өздері тұрған № 1 жатақханаға барып, естелік суреттерге түсті.
Тұлғалар өздері білім алған қара шаңырақтың қаншама қиын-қыстау заманнан өтіп, қазіргі таңда үлкен жетістіктерге жетіп, көркейіп отырғанын көру – көз қуантатынын, университетті басқарған барша ректорлар қауымына, қызметкерлерге алғыстарын білдірді. Түлектерге университет атынан естелік кітаптар табысталды.
Бөлісу:
