QYZPU студенті ММА спортынан қола жүлдегер атанды
-
21 ақпан, 2023
![QYZPU студенті ММА спортынан қола жүлдегер атанды]()
Педагогика және психология институтының дене шынықтыру және спорт мамандығында оқитын 3 курс студенті Ұлан Аяулым 2023 жылдың 11-17 ақпан аралығында Сербия астанасы Белградта өткен Әлем чемпионатында Қазақстан құрамасында өнер көрсетіп, ережесіз жекпе-жек сайысынан (ММА — «mixed martial arts» ) қола жүлдегер атанды.
Чемпионатқа 600- ден астам спортшы қатысса, оның 33-і ММА ұлттық құрамасының мүшесі.
Аяулым 52,2 келі салмақ дәрежесінде «18-20 жас аралығындағы жастар» арасында өнер көрсетіп, өзбекстандық қарсыласын жеңіп, жартылай финалға өтсе, ақтық сайыста қазақстандық спортшыға есе жіберіп 3 орынға табан тіреген.
Әрдайым университетіміздің мәртебесін көтеріп, жүлделі орындар алып қуантып жүрген жас спортшы студентіміздің жетістіктері баршылық.
Атап айтсақ, 2021 жылғы 2 желтоқсан мен 5 желтоқсан аралығында Шымкент қаласында 14 облыс пен республикалық маңызы бар 3 қаланың құрама командаларынан 277 спортшы қатысқан «Жастар және Ересектер» жас санаттары арасында ММА бойынша Қазақстан Кубогы өткен болатын. Аяулым 52,2 келі салмақ дәрежесінде «18-20 жас аралығындағы жастар» атынан сынға түсіп, 1-орынға ие болған.
Сонымен қатар панкратионнан Қазақстанның екі дүркін чемпионы, панкратион бойынша әлем чемпионатының күміс жүлдегері, грэпплингтен, ММА бойынша Қазақстан чемпионы.
Қазіргі таңда ММА бойынша әлем чемпионатынан 2 дүркін қола жүлдегер атанып отыр. Былтырғы жылы Біріккен Араб Әмірліктері, Абу-Даби қаласында өткен Әлем чемпионатында да ММА бойынша қола жүлдені иемденіп қайтқан болатын.
Жеңімпазымызды университет атынан шын жүректен құттықтаймыз! Алар асуларың көп болсын деп тілейміз!
Бөлісу:
