АЙТ МЕРЕКЕСІНЕ ОРАЙ АҚ ДАСТАРҚАН ЖАЙЫЛДЫ
-
31 наурыз, 2025
![АЙТ МЕРЕКЕСІНЕ ОРАЙ АҚ ДАСТАРҚАН ЖАЙЫЛДЫ]()
Айт мейрамы – мұсылман қауымы үшін ерекше маңызға ие ұлық мерекелердің бірі. Бұл күн Рамазан айының аяқталуымен қатар келіп, күллі мұсылмандарды рухани тазалыққа, мейірімділікке және бауырмалдыққа шақырады. Осыған орай, университет әкімшілігі ардагер оқытушылар мен студенттерге арнап мерекелік дастарқан жайып, Айт мейрамының шырайын арттырды.
Ораза айт мейрамына орай Мемлекет басшысы Қасым-Жомарт Кемелұлы Тоқаев халыққа жолдауында бұл мерекенің маңыздылығына тоқталды.
«Қадірлі отандастар! Ораза айт мейрамы құтты болсын! Татулық пен бауырмалдық, жақсылық пен игілік салтанат құратын осы қастерлі мерекенің барша мұсылман қауымы үшін мән-маңызы айрықша. Рамазан айында имандылыққа, рухани тазаруға ұмтылған жұртымыз Айт күні ақ дастарқан жайып, қонақжайлық көрсетеді. Бір-біріне ізгі тілегін арнайды. Мұқтаж жандарға көмек қолын созып, қамқорлық танытады. Сол арқылы адамгершілік құндылықтар қоғамымызда терең орныға түседі. Ораза айт мерекесінің тағылымы ата салтымызбен терең сабақтасып жатыр. Біздің дініміз де, дәстүріміз де азаматтарды бірлік пен ынтымаққа үндейді, өзара сыйлас болуға шақырады», – деді Президент Қасым-Жомарт Кемелұлы Тоқаев.
Бұл дастарқан – тек мерекелік шара ғана емес, сондай-ақ ұжымдық бірліктің, достық пен сыйластықтың айқын көрінісі. Университет қабырғасында ұйымдастырылған бұл игі бастама ардагер ғалым ұстаздардан жастарымыздың батасын алумен қатар, ұлттар мен ұлыстар арасындағы ынтымақтастықты нығайтып, білім ордасының рухани-мәдени құндылықтарға деген құрметін көрсетеді. Мұндай шаралар жастардың бойына ізгілік пен мейірімділік дәнін себуге, ұлттық дәстүрлерді дәріптеуге ықпал етеді.
Айт мерекесі барлық шаңыраққа қуаныш, молшылық пен береке әкелсін!
Бөлісу:
