Нийде Өмер Халисдемир университетімен келісімшартқа қол қойылды
-
09 желтоқсан, 2024
![Нийде Өмер Халисдемир университетімен келісімшартқа қол қойылды]()
«Tech QyzPu Niğde Hack: 24 сағат кодтау және шығармашылық» Хакатоны аясында Қазақ ұлттық қыздар педагогикалық университеті мен Нийде Өмер Халисдемир университеті арасындағы ынтымақтастықты нығайту мақсатында жаңа келісімшартқа қол қойылды.
«Біз 10 жыл бойы Нийде Өмер Халисдемир университетімен әртүрлі бағыттар бойынша студенттер алмасу бағдарламаларын іске асырып жатырмыз. Бұл бағдарламалар жаратылыстану және музыка салаларынан бастап, көптеген басқа бағыттарды қамтиды. Сондай-ақ профессорларымыз Түркияда біліктіліктерін арттырып жүр. Ал студенттеріміз 1-2 семестр бойы білімдерін жетілдіру мақсатында Түркияда білім алып, тәжірибе жинақтайды. Бүгінде ынтымақтастық аясын ұлғайттық. Атап айтқанда, мектепке дейінгі бастауыш білім бағыты және психология мен педагогика бағыты бойынша докторлық бағдарламаларды іске қосу жоспарда бар», – деді Қазақ ұлттық қыздар педагогикалық университетінің Басқарма Төрағасы — Ректоры Гүлмира Қанай.
Аталған келісім аясында бірлескен ғылыми жобаларды жүзеге асыру жоспарланып отыр. Атап айтқанда, жобалар мектепке дейінгі оқыту және тәрбиелеу, бастауыш оқытудың педагогикасы мен әдістемесі, сондай-ақ педагогика және психология бағыттарын қамтиды. Сонымен қатар тараптар докторантура бағдарламаларын бірлесе әзірлеп, осы бағытта жаңа бастамаларды іске асыруға ниет білдіріп отыр.
«Бүгін Қазақ ұлттық қыздар педагогикалық университеті және Нийде Өмер Халисдемир университеті бірлесе «Хакатон» ұйымдастырдық. Сонымен қатар екі университет арасында серіктестік туралы келісімге қол қойылды. Біз екі туыстас мемлекетпіз. Осымен үшінші рет Алматы қаласына келіп отырмыз. Біз өте қуаныштымыз. Ынтымақтастығымыз 100 жылдық болсын», — деді Нийде Өмер Халисдемир университетінің ректоры Хасан Услу.
Бөлісу:
