QyzPU түлектерімен кездесу
-
16 қараша, 2024
![QyzPU түлектерімен кездесу]()
Бүгін Алматыда Қазақ ұлттық қыздар педагогикалық университетінің 80 жылдық мерейтойына орай жоғары оқу орнының зиялы түлектері – ұстаздармен кездесу өтті. Іс-шара Университеттің әр кезеңіндегі түлектерімен кездесу және олардың Университет тарихы мен болашағына қосқан елеулі жетістіктері мен үлестерін атап өту мақсатында ұйымдастырылды.
Кездесу барысында оқу орнының тарихы туралы бейнематериал көрсетіліп, QyzPU-дың бүгінгі жетістіктері мен алдағы мақсаттары таныстырылды. Сонымен қатар Қазақ ұлттық қыздар педагогикалық университетінің 80 жылдық мерейтойына орай Басқарма Төрағасы-Ректор Гүлмира Қанай университеттің дамуына қосқан үлесі үшін зиялы түлектерді арнайы төсбелгілермен марапаттады.
«Мен 1994 жылғы осы оқу орынның түлегімін. Университеттің технологиясы, аудиториясы, кітапханасы, бәрі өте жоғары деңгейде дамығанын көріп, өте қуанышты болдым. 80 жылдық мерейтойымыз құтты болсын. Жетістіктеріміз көп болсын. Ал біз, түлектер, жастарды тәрбиелеуде еңбек ете берейік», - деді С.Сейфуллин атындағы №74 жалпы білім беретін мектептің қазақ тілі мен әдебиет пәнінің мұғалімі Ерназарова Гүлжан Пердаханқызы.
Кездесу барысында ерекше атап өтілген тағы бір маңызды сәт – "100 үздік студент" кітабының тұсаукесері. Бұл кітап университет қабырғасында білім алып жатқан ең үздік студенттердің жетістіктерін ұлықтап, олардың еңбегін бағалау мақсатында жарық көрді. Сонымен қатар "100 үздік студент" байқауының жеңімпаздары салтанатты түрде марапатталып, оларға Алғыс хаттар және қаржылай сертификаттар табысталды: III орын – 200 000 теңге, II орын – 300 000 теңге, I орын – 500 000 теңге.
Бұл іс-шара университеттің 80 жылдық мерейтойын ерекше сән-салтанатпен атап өту ғана емес, сонымен қатар білімге құштар жандардың еңбегі мен жетістіктерін жоғары бағалаудың жарқын көрінісі болды. Қазақ ұлттық қыздар педагогикалық университеті өз тарихындағы маңызды белесті абыроймен атап өтіп, болашаққа сенімді қадам басуда.
Бөлісу:
