QyzPU мен Abai University арасында екіжақты келісімшартқа қол қойылды
-
23 қазан, 2024
![QyzPU мен Abai University арасында екіжақты келісімшартқа қол қойылды]()
22 қазан күні QyzPU мен Abai University арасында ғылыми диалог өтті. Сонымен қатар іс-шара аясында өзара ынтымақтастықты нығайту үшін университеттер екіжақты келісімшартқа қол қойды. Мақсаты – студенттердің ғылымға деген қызығушылығын ояту және ауқымды жобаларды бірлесе жүзеге асыру.
Кездесуде Абай атындағы Қазақ ұлттық педагогикалық университетінің жас ғалымдары өз тәжірибелерімен бөлісіп, диалог алаңын құрды. Екі Университеттің жас ғалымдарына тәжірибе алмасуға және семинар, воркшоп, қонақ дәрістерін ұйымдастыруға, ортақ ғылыми жобаларды бірлесе жүзеге асыруға мүмкіндік туды.
Шараға ҚР Президентінің жанындағы ҚР Ұлттық ғылым академиясының өкілі Төлен Жеңісбек қатысты. Сондай-ақ спикерлер баяндама жасап, өз тәжірибелерімен бөлісті. Онда ғылыми жобаларға өтінім беру, ғылыми мақала және эссе жазу сынды мәселелері талқыланды.
«Бүгін, ең алдымен, осы сәтті пайдалана отырып, Қазақ ұлттық қыздар педагогикалық университетінің келе жатқан 80 жылдық мерейтойымен шын жүректен құттықтаймын. Осы мерейтойға сабақтастыра отырып, біз бүгін Абай атындағы Қазақ Ұлттық педагогика университетінің атынан бір топ ғалым келіп отырмыз. Негізгі мақсат – екіжақты келісімшарт жасасу. Бұл келісімшарт бірнеше саланы қамтиды. Ең бастысы, бірлестікте, серіктестікте үлкен ғылыми жобаларға консорциум ретінде өтінімдер беру. Екіншісі, ғылыми және ғылыми-техникалық қызмет нәтижелерін коммерцализациялау бойынша жобаларға қатысу. Үшіншісі, ғылымиметрия, яғни ғылыми басылымдарды бірлесе жариялау», – деді Абай атындағы Қазақ ұлттық педагогикалық университетінің Зерттеу қызметі және инновация жөніндегі проректоры Ертай Сұлтан.
Студенттер кездесу соңында жас ғалымдарға көкейкесті сұрақтарын қойып, тұщымды жауаптар алды. Бұл серіктестік – үлкен ғылыми зерттеулер мен жобаларға арқау боларына кәміл сенеміз.
Бөлісу:
