QYZPU түлектеріне дипломдар табысталды
-
30 маусым, 2023
![QYZPU түлектеріне дипломдар табысталды]()
Бүгін Қазақ ұлттық қыздар педагогикалық университетінде 2022-2023 оқу жылының түлектеріне арналған ең жауапты да маңызды, салтанатты диплом табыстау рәсімі болып өтті. Биылғы жылы оқу орнын 2050 студент бакалавр дәрежесі бойынша аяқтаса, 131 студент магистратураны, 6 студент докторантураны тәмәмдады. Күндізгі бөлімді аяқтаған 808 студенттің 216-сы үздік диплом иегері атанды.
Диплом табыстау рәсіміне Басқарма Төрағасы — Ректор Гүлмира Әмірханқызы, Ұйымдық трансформация жөніндегі ректор кеңесшісі - Аппарат басшысы: Жуманкулова Еркін Нұрсағатқызы Басқарма мүшесі: Ғылыми жұмыс және халықаралық ынтымастық жөніндегі проректор: Джумакулов Закир Даниярұлы, Басқарма мүшесі: Стратегиялық даму және әлеуметтік жұмыс жөніндегі проректор: Рысбекова Жанар Касымбековна және институт директорлары мен университетіміздің ардагер ұстаздары мен 50 жылдық түлектері де қатысты.
Мемлекеттік ән ұранмен басталған салтанатты жиынның ашылуында Басқарма Төрағасы – Ректор Гүлмира Қанай өз сөзін әдеттегідей «Құрметті әріптестер!» деп бастады. Себебі университтет болашақ педагог мамандарын, ұстаздар қауымын түлеп ұшырып, бүгінгі студент ендігі өз ұстаздарының әріптестеріне айналмақ.
«Құрметті менің әріптестерім, бүгін бәріміз үшін маңызды күн. Бұл күнді бәріміз асыға күттік. Осы күнге жету үшін сіздер талмай еңбек еттіңіздер. Уақыттарыңызды өздеріңіздің білімдеріңізге салдыңыздар. Жолда кездескен барлық кедергілерге бой бермей, алдарыңызға қойған мақсаттарыңызға жете білдіңіздер. Бүгін сіздер маман атанып, өмір жолына аттанғалы тұрсыздар. Осы жолда сіздерге сарқылмас қайрат пен сәттілік тілей отырып, ұстаз ретінде, зерттеуші ретінде өмірден түйген ойларыммен бөлісуге рұқсат етіңіздер! деп құттықтау сөзін жолдаған Басқарма –Төрағасы болашақ педагогтерге өзгеріске бейімді бола білу, ізденімпаз болу, армандай білу, қоғамға қызмет ету, еңбектене білу, үздіксіз білім алу, қайырымды, мейірімді болу сынды 7 қадамнан тұратын жалынды да құнды ақыл кеңесімен бөлісті.
«...Қоғамға қызмет ету ол біздің ұстаз ретіндегі міндетіміз. Өз ісімізге адалдық танытып, алдымызда отырған келешек ұрпаққа білім беру арқылы біз еліміздің өркендеуіне тікелей ықпал ете аламыз. Осы орайда алаш келбеті, қазақтың ақыны Мағжан атамыздың айтқанындай, «Алты алаштың басы қосылса, төр мұғалімдікі деген сөзі ойға келеді. Біздің кәсібіміз алудан гөрі беруді талап етеді. Келешек ұрпақ сауатын ашу – мағыналы да мәнді өмірдің кілті. Сонымен қатар ұстаздық ету – өте жауапты қызмет. Біздің басты жауапкершілігіміз ол өмір бойы үздіксіз білім алу. Балаға сапалы білім беру, қиялын самғата білу, елінің келешегі үшін жауапкершілікті сезінетін, шынайы патриоттар мен ізденімпаздар, шынайы тұлғалар қалыптастыру біздің басты міндетіміз... Армандарыңыз асқақ, ал оған жету жолындағы әрекеттеріңіз нақты болсын, құрметті менің әріптестерім! Тек қана алға! Ақ жол! Сәтттілік!» деп жалынды да жігерлі сөзімен аяқтады өз сөзін Гүлмира Әмірханқызы.
Студенттер үшін өз мамандығы бойынша оқуға түскен кезде ең алғаш танысқан тұлға –институт директоры мен ұстаздарының орны ерекше. Білім алу барысында ақыл кеңесін беріп, қандай мәселеде жандарынан табылып, етене жақын жүрген жандардың ақ тілегін есту мүлдем бөлек. Сондықтан да бітіруші түлектерге институт директорлары да ақжарма тілектерін айтып, әрбір студенттің жетістіктерін ерекше атап өтіп, өз мамандықтарына қатысты ақыл-кеңес, тәжірибелерімен бөлісті.
Сонымен қатар, студенттерге ақ жол тілегін білдіру үшін осыдан 50 жыл бұрын 1973 жылы Қазақ ұлттық қыздар педагогикалық университетін тәмамдаған түлектер атынан Біліктілікті арттыру орталығының директоры Әділханова Айнагүл Саметова сөз алды. Болашақ педагог мамандарға қажет басты қасиеттерді, басты талаптарды түсіндіре келіп, өздерінің альмаматеріне айналған университетке кішігірім сыйлығын да тарту етті.
Сонымен қатар білім нәрімен сусындатып, маман атандырған қасиетті қара шаңырақ Қазақ ұлттық қыздар педагогикалық университетіне, ұстаздар қауымына деген құрметі мен алғысын барша студенттер атынан үздік те белсенді студенттер Математика білім беру бағдарламасының бітірушісі Әлібек Нұрбақыт Нұрланқызы, Биология білім беру бағдарламасының биылғы түлегі Серік Қарақат, Бастауышта оқыту педагогикасы мен әдістемесі білім беру бағдарламасының биылғы түлегі - Әмірханова Камшат Абайқызы құттықтау сөздерін арнады.
Әрі қарай мерекелік шара диплом табыстау рәсіміне ұласты. Әрбір бітіруші түлек Басқарма Төрағасы – Ректор Гүлмира Қанай мен өз институт директорларының қолынан дипломдарын алып, жаңа өмірге қадам бастар бақытты шақтарынан естелік суретке түсті. 2022-2023 оқу жылын тәмамдаған барша студенттер қауымын университет ұжымы атынан шын жүректен құттықтаймыз!
МЕДИА
Бөлісу:
